اسلام آباد (4 جولائی 2026): حالیہ ہی میں استحکام پاکستان پارٹی میں شمولیت اختیار کرنے والے سابق وزیر اعظم آزاد جموں و کشمیر سردار تنویر الیاس کو پارٹی میں اہم عہدہ مل گیا۔
سردار تنویر الیاس کو استحکام پاکستان پارٹی کشمیر کا صدر، جبکہ نثار عنصر ابدالی کو جنرل سیکرٹری مقرر کر دیا گیا۔
گزشتہ روز سردار تنویر الیاس نے وفاقی وزیر اور استحکام پاکستان پارٹی کے سربراہ عبدالعلیم خان سے ملاقات کر کے ساتھیوں سمیت سیاسی جماعت میں شمولیت کا اعلان کیا تھا۔
آزاد جموں و کشمیر کے وزیر زراعت چوہدری علی شان سونی بھی آئی پی پی میں شامل ہوئے، جبکہ سابق وزیر صحت انصار ابدالی نے بھی شمولیت اختیار کی۔
وزیر اعظم آزاد جموں و کشمیر کے سابق مشیر سردار افتخار رشید بھی آئی پی پی کا حصہ بنے، عبدالعلیم خان نے سردار تنویر الیاس اور ان کے ساتھیوں کا خیر مقدم کیا۔ شمولیت اختیار کرنے والوں نے وفاقی وزیر کی قیادت پر بھرپور اعتماد کا اظہار کیا۔